फ्रान्सको अशान्तिबारे ट्रम्पको विवादित टिप्पणी, आवश्यक परे सङ्कटकालको तयारीमा पेरिस

अमेरिकी राष्ट्रपति डोनाल्ड ट्रम्पले फ्रान्समा जारी अशान्तिका लागि राष्ट्रपति इमानुएल म्याक्रोंको आप्रवासन नीतिलाई दोष दिँदै पेरिस चाँडै 'मुस्लिम सहर' बन्ने दाबी गर्नुभएको छ। सोमबार ह्वाइट हाउसबाहिर उहाँले करिब आठ वर्षअघि नै म्याक्रोंलाई सीमा बन्द गर्न सुझाव दिएको र युरोपले सीमा नियन्त्रण कडा नपारे गम्भीर परिणाम भोग्ने बताउनुभएको छ। प्यु रिसर्च सेन्टरका अनुसार फ्रान्समा मुस्लिम जनसङ्ख्या करिब ९ प्रतिशत छ।

जीवनयापनको बढ्दो लागतविरुद्ध सुरु भएको प्रदर्शन सप्ताहान्तमा हिंसात्मक बनेपछि प्रधानमन्त्री सेबास्टियन लेकोर्नुले पेरिस, लिल, निस, मार्सेली, बोर्डो र लियोनलगायत सहरमा आंशिक कर्फ्यु लगाउन निर्देशन दिनुभएको छ। आवश्यक परे सङ्कटकाल घोषणा गर्न सरकार तयार रहेको उहाँले बताउनुभएको छ। गत शनिबार देशभर करिब ५ लाख मानिस सडकमा उत्रिएका थिए।

प्रदर्शनका क्रममा नगरपालिका कार्यालयमा आगजनी र सयौँ पसलमा लुटपाट भएको थियो। प्रहरीले २ हजार ४ सयभन्दा बढी जनालाई हिरासतमा लिएको छ। गृहमन्त्री लरेन्ट नुनेजले प्रहरीले अवस्थामाथि नियन्त्रण गुमाएको बताएपछि प्रधानमन्त्रीले मन्त्रीहरूसँग आपत्कालीन बैठक बोलाउनुभएको थियो।

प्रदर्शनकारीले सोमबार लुभ्र सङ्ग्रहालयको प्रवेशद्वार अवरुद्ध गरेका छन्। 'येलो भेस्ट' आन्दोलनले आगामी शनिबार फेरि प्रदर्शन गर्ने घोषणा गरेको छ।