चीनमा पुटिन र सीसँग भेट्न ट्रम्प तयार, अमेरिकाले मिसाइल रोकेको जेलेन्स्कीको आरोप

अमेरिकी राष्ट्रपति डोनाल्ड ट्रम्पले आगामी महिना चीनमा रुसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङसँग भेट्न आफू तयार रहेको बताउनुभएको छ। सोमबार ह्वाइट हाउसबाहिर पत्रकारसँग कुरा गर्दै उहाँले परमाणु हतियार नियन्त्रण, निशस्त्रीकरण, व्यापार र युक्रेन युद्धबारे छलफल हुन सक्ने सङ्केत गर्नुभएको छ। नोभेम्बर १८ र १९ मा चीनको सेन्जेनमा हुने एसिया–प्रशान्त आर्थिक सहयोग अर्थात् एपेक शिखर सम्मेलनका बेला यो भेट हुन सक्ने चर्चा छ।

क्रेमलिनका प्रवक्ता दिमित्री पेस्कोभले यसबारे कुरा उठे पनि ठोस सहमति नभएको बताउनुभएको छ। चिनियाँ विदेश मन्त्रालयले सम्भावित भेटबारे जानकारी नभएको जनाएको छ। चीनले अमेरिका र रूससँग त्रिपक्षीय परमाणु निशस्त्रीकरण वार्ता अहिले उचित नहुने अडान राख्दै आएको छ।

युक्रेनका विदेशमन्त्री एन्ड्री सिबिहाले किएभलाई बाहिर राखेर हुने बैठकले पुटिनलाई युद्ध जारी राख्न हौसला दिन सक्ने चेतावनी दिनुभएको छ। यसैबीच युक्रेनी राष्ट्रपति भोलोदिमिर जेलेन्स्कीले युरोपेली देशले भुक्तानी गरिसकेका इन्टरसेप्टर मिसाइलको आपूर्ति अमेरिकाले जानाजानी रोकेको आरोप लगाउनुभएको छ। अमेरिकी सिनेटरहरूसँगको भर्चुअल बैठकमा उहाँले ती मिसाइल पठाउन रक्षामन्त्री पीट हेगसेथको हस्ताक्षर चाहिने बताउनुभएको छ।

ट्रम्पले भने जेलेन्स्कीको आलोचना गर्दै युक्रेनका तर्फबाट अर्कै व्यक्तिले वार्ता गर्ने समय आएको बताउनुभएको छ।