राष्ट्रिय टोलीको क्याम्प छाडेका रोनाल्डोलाई ३० दिन निलम्बन र २५५ युरो जरिवाना

पोर्चुगल फुटबल महासंघले राष्ट्रिय टोलीको प्रशिक्षण शिविर छाडेको भन्दै कप्तान क्रिस्टियानो रोनाल्डोलाई ३० दिनका लागि निलम्बन गरेको छ। महासंघको अनुशासन समितिले उहाँलाई २५५ युरो जरिवाना पनि तोकेको छ, जुन नेपाल राष्ट्र बैंकको आजको बिक्रीदरअनुसार झन्डै ४३ हजार ५ सय रुपैयाँ हुन्छ। ४१ वर्षीय रोनाल्डोले गत सेप्टेम्बरमा नेसन्स लिगका लागि जुटेको टोली छाड्नुभएको थियो।

नर्वेविरुद्ध बेन्चमा बसेपछि अक्टोबर १ मा डेनमार्कसँग हुने खेलको सुरुआती एघारमा पनि आफू नपरेको थाहा पाएपछि उहाँ शिविरबाट निस्कनुभएको थियो। रोनाल्डोले प्रशिक्षक जर्ज जेससले दुई पटक वाचा तोडेको आरोप लगाउँदै प्रशिक्षकप्रतिको भरोसा पूरै गुमेको बताउनुभएको थियो। जेससले भने रोनाल्डोसँग त्यस्तो कुनै सहमति नभएको बताउनुभएको छ।

निलम्बन डेनमार्कसँगको खेलको दिनदेखि लागू हुने भएकाले रोनाल्डोले १९ दिन पूरा गरिसक्नुभएको छ र पोर्चुगलको कुनै आगामी खेल गुमाउनुपर्ने छैन। पोर्चुगलले नोभेम्बर १४ मा डेनमार्क र त्यसको तीन दिनपछि वेल्ससँग खेल्नेछ। रोनाल्डोले यसअघि नै गल्ती स्वीकार गर्दै सहकर्मी र समर्थकसँग माफी माग्नुभएको थियो।

पोर्चुगलका लागि रोनाल्डोले हालसम्म २३४ अन्तर्राष्ट्रिय खेल खेलेर १४६ गोल गर्नुभएको छ।