जापानले तीन क्षेत्रमा विदेशी कामदार भर्ना फेरि खोल्ने तयारी

जापान सरकारले अस्पताल, कल्याणकारी संस्था र विद्यालयमा खाना पकाउने तथा बाँड्ने कामका लागि सन् २०२७ अप्रिलदेखि विदेशी कामदार भर्ना फेरि खोल्ने योजना बनाएको छ। सोमबार विज्ञ समूहको बैठकमा प्रस्तुत यो योजना डिसेम्बरमा मन्त्रिपरिषद्बाट पारित गराउने लक्ष्य छ। यसै वर्ष अप्रिलदेखि रेस्टुरेन्ट क्षेत्रमा विशिष्ट सीप भएका कामदारको सङ्ख्या करिब ५० हजारको सीमा नजिक पुगेपछि भर्ना रोकिएको थियो।

अब यस्तो खाना सेवालाई रेस्टुरेन्टबाट हटाएर खाद्य तथा पेय पदार्थ उत्पादन क्षेत्रमा सारिनेछ। खाद्य तथा पेय उत्पादन क्षेत्रको सीमा करिब १ लाख ३३ हजार ५०० छ र जुलाईसम्म त्यसको करिब ७६ प्रतिशत भरिएको थियो। वृद्ध हेरचाह क्षेत्रमा भने सीमा करिब २० हजारले बढाएर १ लाख ४६ हजार ९०० पुर्‍याउने योजना छ।

सरकारले आर्थिक वर्ष २०२८ को अन्त्यसम्म विदेशी कामदारको कुल सीमा करिब १२ लाख ३१ हजार ९०० राख्ने योजना बनाएको छ। यसमा विशिष्ट सीप अनुमतिका करिब ८ लाख २५ हजार र नयाँ सीप विकास रोजगार कार्यक्रमका करिब ४ लाख ६ हजार कामदार समावेश छन्। यो सङ्ख्या भर्ना हुने निश्चित कामदार नभई अधिकतम सीमा मात्र हो।

नेपाल राष्ट्र बैंकका अनुसार आज १० जापानी येनको खरिददर ९ रुपैयाँ ६० पैसा छ।