होर्मुजमा तेल ट्याङ्करमा विस्फोट, ऊर्जा संकट बढ्न सक्ने कतारको चेतावनी

इरानको रिभोलुसनरी गार्ड्सले होर्मुज जलमार्गमा एउटा तेल ट्याङ्कर समुद्री बारुदी सुरुङमा ठोक्किएर विस्फोट भएको र आगो लागेको दाबी गरेको छ। गार्ड्सका अनुसार उक्त ट्याङ्करले इरानको अनुमतिबिना निषेधित मार्ग प्रयोग गरेको थियो। अमेरिका र इजरायलसँगको युद्धपछि इरानले यो जलमार्गमा जहाज आवागमनमा कडाइ गरेको छ भने अमेरिकाले इरानी तेल निर्यात रोक्न नौसैनिक नाकाबन्दी लगाएको छ।

यो मार्ग विश्वको तेल र तरल प्राकृतिक ग्यास ढुवानीका लागि प्रमुख समुद्री नाका हो। यसैबीच कतारका उपप्रधानमन्त्री शेख साउद बिन अब्दुलरहमान अल थानीले विश्वव्यापी ऊर्जा संकट अझै गहिरिन सक्ने चेतावनी दिनुभएको छ। सोमबार दोहामा भएको ग्लोबल सेक्युरिटी फोरममा उहाँले ऊर्जा संकट अझै चरम बिन्दुमा नपुगेको बताउनुभएको छ।

फेब्रुअरी २८ मा अमेरिका र इजरायलले इरानमाथि आक्रमण गरेपछि होर्मुज मार्गमा अस्थिरता बढेको छ। मार्चमा कतारको रास लाफान औद्योगिक क्षेत्रमा भएको इरानी आक्रमणले ग्यास उत्पादन पूर्वाधारमा क्षति पुर्‍याएको थियो, जसको मर्मतमा वर्षौँ लाग्न सक्ने अनुमान छ। अल थानीले होर्मुज हुँदै आवतजावत गर्ने जहाजमाथि पारवहन शुल्क लगाउन नहुने अडान राख्नुभएको छ।

कतार, पाकिस्तान र ओमानको मध्यस्थताले अमेरिका, इरान र इजरायलबीच सहमति गराउन मद्दत गर्ने आशा पनि उहाँले व्यक्त गर्नुभएको छ।