दसैँमा थरिथरि पिङ, तनहुँमा पिङ संस्कृति जोगाउन युवाको पहल

दसैँमा गाउँघरमा पिङ हाल्ने परम्परा पातलिँदै गएपछि तनहुँका युवा क्लबहरूले लिङ्गे र रोटे पिङ बनाएर यसलाई जोगाउने पहल गरेका छन्। मनोरञ्जनका आधुनिक साधन बढ्नु र पिङ हाल्ने जनशक्तिको कमी हुनुले यो परम्परा सङ्कटमा परेको छ। भानु नगरपालिका–१२ घलेछापको पुतलीचौरमा घलेछाप युवा क्लबले स्थानीय स्रोत जुटाएर लिङ्गे पिङ ठड्याएको छ।

नयाँ पुस्तालाई यस परम्पराको महत्त्व बुझाउन पिङ बनाइएको क्लबका अध्यक्ष कुशलचन्द्र अधिकारीले बताउनुभएको छ। व्यास नगरपालिका–१२ कमलबारीको एकता युवा क्लबले पनि लिङ्गे पिङ बनाएको छ। धादिङमा भने अघिल्ला वर्ष रोटे, चर्खे र लिङ्गे पिङ हालिने कतिपय ठाउँमा यस वर्ष पिर्का नै हालिएका छैनन्।

भोटेकोशी र बुढीगण्डकीको बाढीले असर पारेका धादिङ, नुवाकोट र रसुवामा दसैँको उत्साह कम देखिएको छ। नीलकण्ठ नगरपालिका–३ का कृष्णबहादुर पाठकका अनुसार गाउँमा युवा कम छन् र बालबालिका मोबाइलमै व्यस्त हुन्छन्। काठमाडौँमा भने व्यस्त सडक छेउको खाली चौरमा ठडिएको लिङ्गे पिङमा एउटा बालक मच्चिरहेको दृश्य देखिएको छ।