चीनको तेस्रो त्रैमासिक आर्थिक वृद्धि अपेक्षाभन्दा उच्च

चीनको अर्थतन्त्र चालु वर्षको तेस्रो त्रैमासिकमा विश्लेषकको अनुमानभन्दा छिटो बढेको छ। चीनको राष्ट्रिय तथ्याङ्क ब्युरोले सोमबार सार्वजनिक गरेको विवरणअनुसार जुलाईदेखि सेप्टेम्बरसम्म कुल गार्हस्थ्य उत्पादन करिब ४.५ प्रतिशतले बढेको छ। दोस्रो त्रैमासिकमा यो दर करिब ४.३ प्रतिशत थियो।

एएफपीले अर्थशास्त्रीबीच गरेको सर्वेक्षणले तेस्रो त्रैमासिकका लागि करिब ४.४ प्रतिशत वृद्धिको अनुमान गरेको थियो। यस वर्षको पहिलो नौ महिनामा वृद्धिदर करिब ४.६ प्रतिशत पुगेको छ। कम्प्युटर, अर्धचालक र कृत्रिम बौद्धिकता अर्थात् एआईसम्बन्धी उपकरणको विश्वव्यापी मागले निर्यातलाई बलियो बनाएको छ।

पहिलो नौ महिनामा चीनको निर्यात करिब १६ प्रतिशतले बढेको छ। तर घरजग्गा क्षेत्रको लगानी घटेको छ र खुद्रा बिक्रीमा सामान्य सुधार मात्र देखिएको छ। चीन सरकारले यस वर्ष करिब ४.५ देखि ५ प्रतिशत आर्थिक वृद्धिको लक्ष्य राखेको छ।

ऊर्जा लागत बढेका कारण अन्तर्राष्ट्रिय मुद्राकोषले चीनको वार्षिक वृद्धि अनुमान घटाएर करिब ४.५ प्रतिशत कायम गरेको छ। हुटोङ रिसर्चकी अर्थशास्त्री गुओ शानले अहिले निर्यात मात्र अर्थतन्त्रको बलियो पक्ष रहेको बताउनुभएको छ। बढ्दो व्यापार बचतका कारण अमेरिका र युरोपेली संघसँग चीनको तनाव पनि बढेको छ।

नेपाल राष्ट्र बैंकका अनुसार आज एक चिनियाँ युआनको खरिददर २२ रुपैयाँ ६८ पैसा छ।