ट्रम्पले गुप्तचर प्रमुख क्लेटनलाई ह्वाइट हाउसको एआई कार्यदलको नेता तोके

अमेरिकी राष्ट्रपति डोनाल्ड ट्रम्पले राष्ट्रिय गुप्तचर प्रमुख जे क्लेटनलाई ह्वाइट हाउसको कृत्रिम बुद्धिमत्तासम्बन्धी कार्यदलको नेतृत्व सुम्पनुभएको छ। आइतबार गरिएको यो नियुक्ति अनुसन्धानकर्ताहरूले एआई प्रविधिका सम्भावित जोखिमबारे सचेत गराइरहेका बेला भएको हो। राष्ट्रपति ट्रम्पले सामाजिक सञ्जाल ट्रुथ सोसलमार्फत क्लेटनलाई 'सुपर इन्टेलिजेन्स फोर्स' को जिम्मा दिइएको जानकारी दिनुभएको छ।

उहाँका अनुसार यो कार्यदलले संघीय सरकारका विभिन्न निकायको एआई प्रयासबीच समन्वय गर्नेछ। ट्रम्पले सुपर इन्टेलिजेन्सका क्षेत्रमा अमेरिका विश्वमा अग्रस्थानमा रहनुपर्ने बताउनुभएको छ। धेरैले यो प्रविधिलाई औद्योगिक क्रान्ति र इन्टरनेटभन्दा पनि ठूलो परिवर्तन मान्ने गरेको उहाँले उल्लेख गर्नुभएको छ।

ट्रम्पका भनाइमा सुपर इन्टेलिजेन्सले सबै अमेरिकीको हित र रक्षा गर्नुका साथै उनीहरूको जीवन सुधार्नेछ। यसैबीच, ह्वाइट हाउसले शनिबार रिपोर्टर बेनी रे हार्मनीलाई प्रवक्ता तथा सहायक प्रेस सेक्रेटरीमा नियुक्त गरेको छ। हार्मनी यसअघि 'रियल अमेरिकाज भ्वाइस' मा ह्वाइट हाउस संवाददाता हुनुहुन्थ्यो र प्रेस पूलको नियमित सदस्यसमेत बन्नुभएको थियो।

उहाँले सोमबारदेखि कार्यभार सम्हाल्दै हुनुहुन्छ।