बीमा कम्पनीका सर्तले मौरीपालक किसान दोधारमा

चितवनका मौरीपालक किसानले बीमा कम्पनीका सर्तका कारण मौरीको बीमा गर्न हिचकिचाइरहेका छन्। कालिका नगरपालिका-६ का जगबहादुर पुनका अनुसार सवारी दुर्घटना, चक्काजाम र विषादी प्रयोगबाट हुने क्षतिलाई बीमाले समेट्दैन। विसं २०७४ मा विषादीका कारण करिब २० घार मौरी गुमाएपछि बीमा गर्न खोजे पनि उहाँले अझै निर्णय गर्न सक्नुभएको छैन।

अर्का किसान विष्णुप्रसाद भुसालले कृषि ऋण नलिएका किसानको बीमा गर्न कम्पनीहरू तयार नहुने गुनासो गर्नुभएको छ। विसं २०८० मा करिब ११० घार मौरी मरेकामा करिब ६ घारको मात्र भुक्तानी पाएको र त्यसका लागि झन्डै छ महिना कुरेको उहाँले बताउनुभएको छ। कृषि विकास कार्यालय चितवनका प्रमुख झलकनाथ कँडेलका अनुसार मौरी बीमामा राज्यले करिब ८० प्रतिशत अनुदान दिन्छ।

तर हालसम्म कुनै किसान दाबी भुक्तानी माग्न कार्यालयमा नआएको उहाँले बताउनुभएको छ। जानकारीको कमी र झन्झटिलो प्रक्रियाले किसान बीमाबाट टाढा रहेको उहाँको भनाइ छ। कार्यालयका अनुसार जिल्लामा करिब ४५० किसानले झन्डै १९ हजार ५०० घार मेलिफेरा जातका मौरी पालेका छन्।

बागमती प्रदेश कृषि, पशुपन्छी, वन तथा वातावरण मन्त्रालयका सचिव सुधीर श्रेष्ठका अनुसार प्रदेश सरकार बीमा प्रक्रिया सरल बनाउन सहयोग गर्न तयार छ। किसानको आकर्षण नबढ्नुका कारण पहिचान गरी समाधान खोजिने उहाँले जनाउनुभएको छ।