राष्ट्रपति, उपराष्ट्रपति र राष्ट्रियसभा अध्यक्षद्वारा बडादसैँको शुभकामना

राष्ट्रपति रामचन्द्र पौडेलले बडादसैँ २०८३ का अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति, समृद्धि, सुस्वास्थ्य एवम् उत्तरोत्तर प्रगतिको कामना गरेका छन्। शुभकामना सन्देशमा उनले बाढी प्रभावितको पुनःस्थापनामा एकजुट हुन अपिल पनि गरेका छन्।

राष्ट्रपति पौडेलले दसैँलाई असत्यमाथि सत्यको विजयको उत्सव भनेका छन्। उनका अनुसार बडादसैँले सामाजिक एकता, सद्भाव र भाइचारालाई बलियो बनाउँछ र सांस्कृतिक एकता तथा पहिचानलाई अक्षुण्ण राख्न मद्दत गर्छ। पारिवारिक, सामाजिक, धार्मिक, सांस्कृतिक एवं राष्ट्रियताका हिसाबले दसैँको अत्यन्तै महत्त्व रहेको उनले उल्लेख गरेका छन्।

उपराष्ट्रपति रामसहाय प्रसाद यादवले हिन्दु धर्मावलम्बीको महान् पर्व विजयादशमी धार्मिक आस्थाको विषय मात्र नभई मानवीय मूल्य, नैतिकता र सदाचारको विजयको उत्सव भएको बताएका छन्। उनले विजयादशमी २०८३ का अवसरमा शुभकामना सन्देश जारी गरेका हुन्।

त्यस्तै, राष्ट्रियसभाका अध्यक्ष नारायणप्रसाद दाहालले राष्ट्रिय एकता, सामाजिक सद्भाव, सहिष्णुता र पारस्परिक सम्मानलाई अझ सुदृढ बनाउँदै समुन्नत, समावेशी र समृद्ध नेपाल निर्माणमा योगदान गर्न बडादसैँले सबैलाई प्रेरणा प्रदान गरोस् भन्ने शुभकामना व्यक्त गरेका छन्।