चार महिनापछि गुल्मीको रेसुङ्गामा हवाई सेवा फेरि सुरु

गुल्मीको रेसुङ्गा विमानस्थलमा करिब चार महिनापछि मङ्गलबारदेखि हवाई उडान फेरि सुरु भएको छ। प्रतिकूल मौसमका कारण गत जेठको तेस्रो सातादेखि यहाँ उडान रोकिएको थियो। विमानस्थलका स्टेसन प्रमुख सुमन थापाका अनुसार खराब मौसम, बाक्लो कुहिरो र हावाको चापले उडानमा समस्या आउन सक्ने भएकाले सेवा रोक्नुपरेको थियो।

पहिलो दिन नेपाल वायुसेवा निगमको ट्वीनअटर विमान एक दर्जनभन्दा बढी यात्रु लिएर काठमाडौंबाट रेसुङ्गा पुगेको थियो। फर्कंदा भने विमानमा दुई जना मात्र यात्रु थिए। मौसम अनुकूल भएपछि निगमले अब सातामा तीन दिन उडान गर्ने तालिका बनाएको छ।

निगमका अनुसार काठमाडौंबाट रेसुङ्गाको भाडा करिब १० हजार ७ सय रुपैयाँ र रेसुङ्गाबाट काठमाडौंको भाडा करिब १० हजार ५ सय रुपैयाँ तोकिएको छ। उडान बन्द हुँदा बिरामी, वृद्धवृद्धा र जरुरी कामले राजधानी जानुपर्ने यात्रु बढी मारमा परेका थिए। निगमले २०८० साल वैशाख २९ गतेदेखि रेसुङ्गामा व्यावसायिक उडान सुरु गरेको थियो।