च्याम्पियन्स लिग: राफिन्हा गालातासारेविरुद्ध पनि खेल्ने छैनन्

बार्सिलोनाका कप्तान तथा ब्राजिलियन फरवार्ड राफिन्हा च्याम्पियन्स लिगअन्तर्गत मंगलबार गालातासारेविरुद्ध हुने खेलमा पनि खेल्नुहुने छैन। प्रशिक्षक हान्सी फ्लिकले उहाँको शारीरिक अवस्था हेरेर टोलीमा नसमेट्ने निर्णय गर्नुभएको हो। राफिन्हा यसअघि गेटाफेविरुद्धको खेलमा पनि मैदानमा उत्रिनुभएको थिएन।

पहिले चोटबाट छिटो फर्किने प्रयासमा उहाँलाई दुईपटक मांसपेशीको समस्या देखिएको थियो। त्यसैले यसपटक अनावश्यक जोखिम नलिने विषयमा फ्लिक र राफिन्हाबीच सहमति भएको छ। आगामी व्यस्त खेलतालिका हेरेर क्लबले तत्कालको खेलभन्दा उहाँको लामो समयको फिटनेसलाई प्राथमिकता दिएको छ।

अक्टोबर २५ मा रियल मड्रिडसँग हुने एल क्लासिकोसम्म राफिन्हालाई पूर्ण तयार बनाउनु क्लबको मुख्य लक्ष्य देखिएको छ। गालातासारेविरुद्ध फ्रेन्की डी योङ, आन्द्रेस क्रिस्टेन्सन र रुनी बार्डजी पनि उपलब्ध हुने छैनन्।