चाडपर्वमा नयाँ नेपाली फिल्मका ट्रेलर सार्वजनिक: ‘कबड्डी ५’, ‘हिमालयन गोल्ड’ र ‘आबाट आमा २’

तीनवटा नयाँ नेपाली फिल्मका ट्रेलर सार्वजनिक भएका छन्। अभिनेता सुनिल थापाको अभिनय रहेको ‘हिमालयन गोल्ड’ मंसिर ४ गतेदेखि प्रदर्शनमा आउँदै छ। धिराज राजवंशीको निर्देशनमा बनेको यो फिल्म बाँच्नका लागि गरिने सङ्घर्षको कथामा आधारित छ।

परीक्षा लिम्बू, कर्मा शाक्य, राहुल एन. मुखिया र सजन थापाले पनि यसमा अभिनय गरेका छन्। भारतीय वितरक एए फिल्म्ससँग सम्झौता भएकाले यो फिल्म भारतभर एकैपटक प्रदर्शन हुने पहिलो नेपाली फिल्म बनेको निर्माण पक्षले जनाएको छ।

निर्माण पक्षका अनुसार भारत, जापान र अस्ट्रेलियालगायतका देशमा यो फिल्म सबटाइटलसहित नेपाली भाषामै देखाइनेछ। वितरकले डबिङको विकल्प दिए पनि मौलिकता जोगाउन नेपालीमै राखिएको निर्देशक राजवंशीले बताउनुभएको छ। फिल्ममा गीत नराखी पृष्ठभूमि सङ्गीतमा जोड दिइएको छ।

रामबाबु गुरुङ लेखक तथा निर्देशक रहेको ‘कबड्डी ५’ को ट्रेलर मङ्गलबार सार्वजनिक भएको छ र यो कार्तिक ६ गतेदेखि देशभर प्रदर्शन हुनेछ। दयाहाङ राई, विजय बराल, बुद्धि तामाङ र मिरुना मगरलगायतले यसमा अभिनय गरेका छन्। प्रदर्शनभन्दा चार दिनअघि सोमबार सार्वजनिक ‘आबाट आमा २’ को ट्रेलरले युट्युबमा छोटो समयमै लाखौँ भ्युज पाएको छ।

यसमा पल शाह र मलिका महतको जोडीलाई दर्शकले रुचाएका छन्।