मतदाता सूची विवादमा दिल्लीको जन्तरमन्तर पुगेका विपक्षी नेता हिरासतमा

भारतमा मतदाता सूचीमा हेरफेर भएको आरोप लगाउँदै आन्दोलनरत युवा नेतृत्वको कक्रोच जनता पार्टी, सिजेपीका प्रमुख नेताहरूलाई दिल्ली प्रहरीले हिरासतमा लिएको छ। मंगलबार बिहान नयाँदिल्लीको जन्तर मन्तरमा लगाइएको सुरक्षा घेरा नाघेर भित्र पसेपछि उनीहरूलाई नियन्त्रणमा लिइएको हो। नियन्त्रणमा लिइएकामा पार्टीका नेता आशुतोष राँका, सौरभ दास र अजिंक्य शिन्देसहित अन्य स्वयंसेवक छन्।

विपक्षी दलहरूले सत्तारूढ भारतीय जनता पार्टी र प्रधानमन्त्री नरेन्द्र मोदीलाई फाइदा पुग्ने गरी मतदाता सूचीमा हेरफेर गरिएको आरोप लगाउँदै निर्वाचन आयोग प्रमुखको राजीनामा मागिरहेका छन्। निर्वाचन आयोगले भने अनियमितताको आरोप अस्वीकार गर्दै आएको छ। दिल्ली प्रहरीले सोमबार जन्तर मन्तरलाई आधिकारिक प्रदर्शनस्थलको सूचीबाट हटाएको जनाएको थियो।

केही दिनदेखि उक्त स्थल पहेँलो धातुको बारले घेरिएको थियो र त्यहाँ ठूलो सङ्ख्यामा प्रहरी खटाइएको थियो। सिजेपीले सोमबार नै प्रमुख निर्वाचन आयुक्त ज्ञानेश कुमारविरुद्ध सोही स्थलमा प्रदर्शन गर्ने मिति तोक्न प्रहरीलाई २४ घण्टे अल्टिमेटम दिएको थियो। पार्टीका करिब ६ जना सदस्य नजिकैको जेडीयू कार्यालयको परिसर हुँदै पर्खाल नाघेर विरोधस्थलमा पुगेको प्रहरीको आशंका छ।