आईएमएफ: ऊर्जा सङ्कटबीच पनि विश्व अर्थतन्त्रको वृद्धि अनुमानमा सुधार

अन्तर्राष्ट्रिय मुद्रा कोष, आईएमएफले सन् २०२६ मा विश्व अर्थतन्त्र करिब ३.१ प्रतिशतले बढ्ने अनुमान गरेको छ। मंगलबार सार्वजनिक विश्व आर्थिक परिदृश्य प्रतिवेदनमा कोषले जुलाईको अनुमानलाई ०.१ प्रतिशत बिन्दुले माथि सारेको हो। सन् २०२५ मा विश्वको वृद्धिदर करिब ३.५ प्रतिशत थियो।

पश्चिम एसियाको युद्धले ऊर्जा महँगो बनाए पनि कृत्रिम बौद्धिकता, एआईसँग जोडिएको माग र लगानीले वृद्धिलाई धानेको प्रतिवेदनमा उल्लेख छ। युद्धअघिको तुलनामा प्रशोधित पेट्रोलियम पदार्थको मूल्य करिब ७० देखि ९५ प्रतिशतसम्म बढेको कोषले जनाएको छ। तेलको मौज्दात घट्दै जाँदा र ऋणको लागत बढ्दा अर्को ठूलो झट्का थेग्ने क्षमता कमजोर बनेको आईएमएफको चेतावनी छ।

कोषले चीनको वृद्धिदर करिब ४.५ प्रतिशत रहने भन्दै जुलाईको अनुमानबाट ०.१ प्रतिशत बिन्दु घटाएको छ भने सन् २०२७ मा यो करिब ४ प्रतिशतमा झर्ने प्रक्षेपण छ। ऊर्जा आयातमा भर पर्ने न्यून आय भएका देशहरू महँगी र आपूर्ति सङ्कटबाट बढी मारमा पर्ने प्रतिवेदनले जनाएको छ। कोषकी प्रमुख अर्थशास्त्री सिल्भाना तेन्रेरोले युद्ध लम्बिए मुद्रास्फीति बढ्ने र आर्थिक वृद्धि सुस्त हुने बताउनुभएको छ।

बैंककमा भइरहेको आईएमएफ र विश्व बैंकको वार्षिक बैठकमा उहाँले एआईको मागले चीन, भारतलगायत एसियाली देशको वृद्धिलाई टेवा दिएको बताउनुभयो। उहाँले घाटा घटाउन बजेट कटौती गर्न देशहरूलाई र मुद्रास्फीति नियन्त्रणका लागि कडा नीति लिन केन्द्रीय बैंकहरूलाई आग्रह गर्नुभएको छ।