विश्वकप लिग–२ : नेपाल आज घरेलु टोली ओमानसँग खेल्दै

आईसीसी क्रिकेट विश्वकप लिग–२ अन्तर्गत नेपालले आज मंगलबार घरेलु टोली ओमानसँग प्रतिस्पर्धा गर्दैछ। खेल ओमानको अल अमेरात क्रिकेट मैदान (मिनिस्ट्री टर्फ १) मा नेपाली समयअनुसार बिहान सवा ११ बजे सुरु हुनेछ।

ओमानमा भइरहेको त्रिदेशीय एकदिवसीय शृङ्खलामा यो नेपालको दोस्रो खेल हो। दुवै टोली लगातार दोस्रो जित निकाल्ने लक्ष्यसहित मैदान उत्रने बताइएको छ।

नेपालले लिग–२ अन्तर्गत आफ्नो अन्तिम शृङ्खला खेलिरहेको छ। शीर्ष ६ स्थान जोगाउन नेपाललाई यो खेल जित्नैपर्ने दबाब रहेको छ।

खेलको नतिजा र शृङ्खलाका बाँकी खेलले लिग–२ को अंकतालिकामा नेपालको स्थान निर्धारण गर्नमा भूमिका खेल्नेछन्।