उपत्यकामा ग्यास साटफेर बन्द हुँदै, बिहीबारदेखि डिलरबाटै बिक्री

काठमाडौँ उपत्यकामा सबै ब्रान्डका ग्यास सिलिन्डर साटफेर गरी बेच्ने संयुक्त व्यवस्था बुधबार असोज २८ गतेसम्म मात्र लागु हुने भएको छ। नेपाल एलपी ग्यास उद्योग सङ्घका अध्यक्ष दिवान चन्दका अनुसार बिहीबारदेखि पहिलेजस्तै डिलरमार्फत नियमित बिक्री वितरण सुरु हुनेछ। दसैँका बेला उपभोक्तालाई सहज होस् भनेर आइतबारदेखि जुनसुकै ब्रान्डको खाली सिलिन्डर बुझाएर तोकिएको केन्द्रबाट भरिएको सिलिन्डर लिन पाइने व्यवस्था गरिएको थियो।

एउटा ब्रान्डको सिलिन्डर अर्कोसँग साट्न नपाएको गुनासो सम्बोधन गर्न यो विशेष व्यवस्था ल्याइएको थियो। पहिलो दिन ६ केन्द्रबाट सुरु भएको बिक्री सोमबार थप ५ ठाउँ जोडेर ११ केन्द्र पुर्‍याइएको थियो। सुरुमा असोज ३१ सम्म भनिएको व्यवस्था भोलिपल्ट ३० गतेसम्म भनियो, तर मंगलबार फेरि अवधि घटाइएको हो।

यो व्यवस्थाअन्तर्गत बिक्री केन्द्रहरूमा उपभोक्ता लामो लाइनमा उभिनुपरेको थियो। बजारमा ग्यासको अभाव नरहेको सङ्घको दाबी छ। सङ्घले असुविधाप्रति क्षमा माग्दै उपभोक्तालाई आफ्नो नजिकको आधिकारिक डिलरबाटै ग्यास किन्न अनुरोध गरेको छ।