राजमार्गका होटलमा बासी र अखाद्य खाना खुवाए होटल र चालक दुवैमाथि कारबाही

राजमार्गका होटल र रेस्टुरेन्टमा खाएको अखाद्य खानाका कारण यात्रु बिरामी परेमा होटल सञ्चालक र सवारी चालक दुवैमाथि कडा कारबाही हुने भएको छ। यातायात व्यवस्था विभागले सार्वजनिक सवारी चालक, होटल व्यवसायी र यात्रुका नाममा सूचना जारी गरेको छ। यात्रुवाहक गाडी रोकिने होटलमा सरसफाइ नहुने, बासी र झिँगा भन्केको खाना दिइने र चर्को मूल्य असुलिने गुनासो बढेपछि यो कदम चालिएको हो।

पूर्वाधार विकास मन्त्रालयमा बसेको सरोकारवाला निकायहरूको बैठकको निर्णयअनुसार विभागले सूचना निकालेको हो। गुनासो आएपछि त्यस्ता होटल र रेस्टुरेन्टमा अनुगमन पनि सुरु भएको छ। अबदेखि चालकले खाजा र खानाका लागि सफा, स्वच्छ र गुणस्तरीय खाना पाइने ठाउँलाई प्राथमिकता दिनुपर्नेछ।

खाना अस्वच्छ भएमा वा मूल्यमा ठगी भएको महसुस गरेमा यात्रुले प्रहरीको १०० नम्बरमा फोन गर्न सक्नेछन्। त्यस्तै सम्बन्धित सरकारी कार्यालयमा पनि उजुरी दिन सकिनेछ।