तिहारअघि वर्षाले सयपत्री खेतीमा क्षति, किसान निराश

तिहार र छठलाई लक्षित गरी लगाइएको सिरहाको सयपत्री फूल खेतीमा लगातार २ दिनको वर्षाले क्षति पुर्‍याएको छ। गोलबजार नगरपालिकाका किसान फूल टिपेर बजार पठाउने तयारी गर्दै गर्दा धेरै बोट भुइँमा ढलेका छन्। गोलबजार–३ का मनु स्याङ्दनले यस वर्ष करिब ४ कठ्ठा जग्गामा सयपत्री लगाउनुभएको छ।

करिब १५ देखि २० वर्षदेखि फूल खेती गर्दै आउनुभएका स्याङ्दनले यसपालि करिब १ लाख रुपैयाँ लगानी गरेर चाडपर्वमा करिब ४ लाख रुपैयाँ कमाउने लक्ष्य राख्नुभएको थियो। वर्षाले करिब २ हजार ५०० बोट ढालेपछि लगानी र आम्दानी दुवै गुमेको उहाँले बताउनुभएको छ। गोलबजार–६ का रुदल नायकको करिब ६ कठ्ठामा लगाइएको फूलमध्ये ३ देखि ४ कठ्ठाको बोट वर्षाले ढालेको छ।

सोही वडाकी इन्द्रकुमारी लामाको करिब ५ कठ्ठामा लगाइएको सयपत्रीमा पनि ठूलो क्षति पुगेको छ। करिब १० वर्षदेखि फूल खेती गर्दै आउनुभएकी लामाले तिहार र छठमा फूल बेच्ने तयारी गर्नुभएको थियो। अर्कोतर्फ, बागलुङ नगरपालिका–१ रामरेखाको मैनडाँडामा कमला थापाले प्लास्टिक टनेलमा उत्पादन गरेको सयपत्री तिहारमा बिक्रीका लागि तयार भएको छ।

उहाँले करिब ३ वर्षदेखि ३ वटा टनेलमा मौसमी र बेमौसमी फूल फलाउँदै नजिकैको कालिका मन्दिरमा आउने भक्तजनलाई बेच्दै आउनुभएको छ।