युरोपमा महँगीविरुद्ध युवाको प्रदर्शन, फ्रान्समा ७० हजार प्रहरी परिचालन

फ्रान्समा शनिबार हुन लागेको देशव्यापी प्रदर्शन हिंसात्मक हुन नदिन सरकारले देशभर करिब ७० हजार प्रहरी खटाएको छ। महँगी, कमजोर सार्वजनिक सेवा र राष्ट्रपति इम्यानुएल म्याक्रोंको सरकारप्रति बढ्दो असन्तुष्टिका बीच यो प्रदर्शन हुन लागेको हो। दुई साताअघिको प्रदर्शनमा विभिन्न सहरमा पसल, सार्वजनिक भवन र व्यवसायमा तोडफोड भएको थियो।

गृहमन्त्री लरेन नुनेजले हेलोविनको दिन पर्ने यो प्रदर्शनलाई 'अत्यन्त उच्च जोखिम' को दिन भन्नुभएको छ। मास्कको आडमा प्रदर्शनकारीले पहिचान लुकाउन सक्ने आशंकामा शान्ति भङ्ग हुने अवस्थामा अनुहार छोप्न रोक लगाउन सकिने कानुनी प्रावधान रहेको उहाँले बताउनुभएको छ। अमेरिकी दूतावासले फ्रान्समा रहेका आफ्ना नागरिकलाई ठूला जमघटबाट टाढा बस्न सुझाव दिएको छ।

फ्रान्समा सेप्टेम्बरको अन्त्यतिर सुरु आन्दोलन तेस्रो साता पुगेको छ। सन् २०२७ को बजेटमाथि बहस सुरु भएसँगै असन्तुष्टि चुलिएको हो, बढ्दो सार्वजनिक ऋणका कारण सरकारमाथि खर्च घटाउने दबाब छ। विद्यार्थी, ट्रेड युनियन र पुनः सक्रिय 'यल्लो भेस्ट' समर्थक एकै ठाउँमा उभिएका छन्।

इटालीमा शुक्रबार आमहडतालको दिन हजारौँ विद्यार्थी र मजदुरले तलबवृद्धि माग्दै सैन्य खर्च बढाउने नीतिको विरोध गरेका छन्। जर्मनीमा युवाहरूले शनिबार ३० भन्दा बढी सहरमा प्रदर्शनको तयारी गरेका छन्, जहाँ आयोजकका अनुसार करिब १ लाख ६० हजार मानिस जुट्ने अपेक्षा छ। उनीहरूले शिक्षामा थप लगानी माग्दै अनिवार्य सैन्य सेवाको विरोध गरेका छन्।