हुम्लाको छात्रावासका कामदारको पारिश्रमिक ४४ वर्षदेखि उही

हुम्लाको सदरमुकाम सिमकोटस्थित सरकारी महिला छात्रावासमा भान्सेको पारिश्रमिक ४४ वर्षदेखि एउटै रहेको छ। छात्रावास २०३९ सालमा स्थापना भएको थियो र त्यसबेलादेखि नै भान्सेका लागि मासिक ६ हजार रुपैयाँ तोकिँदै आएको छ। सरकारी छात्रावास भए पनि सरोकारवाला निकायको ध्यान नपुग्दा पारिश्रमिक बढ्न नसकेको हो।

हाल त्यहाँ काम गरिरहनुभएकी सफलता बोहराले मासिक ६ हजार रुपैयाँ मात्र पाउने गरेको बताउनुभएको छ। बेरोजगारीका कारण कम ज्याला भए पनि यो काम गर्नुपरेको उहाँको भनाइ छ। उहाँको काम बिहान ६ बजे सुरु भएर बेलुका ९ बजेसम्म चल्छ।

उहाँ दिनहुँ २० जना छात्राका लागि बिहान र बेलुका आगोको रापमा खाना पकाउनुहुन्छ। भाँडा माझ्ने, सरसफाइ, खानेपानी र दाउराको जोहो, खाद्यान्न व्यवस्थापन तथा शौचालय सफाइको जिम्मा पनि उहाँकै छ। सरकारी कर्मचारीको तलब बढे पनि आफ्नो पारिश्रमिक नबढेकोमा बोहराले गुनासो गर्नुभएको छ।

छात्रावासका वार्डेन रेशमराजले भान्सेको पारिश्रमिक निकै कम भए पनि आफूले केही गर्न नसक्ने बताउनुभएको छ। करार कर्मचारीको पारिश्रमिक यति लामो समय नफेरिनु सरोकारवाला निकायको कमजोरी भएको उहाँको भनाइ छ। स्थापनाकालदेखि अहिलेसम्म चार जना भान्से फेरिइसकेका छन्।

बोहराले पारिश्रमिक पुनरावलोकन गर्न सरोकारवाला निकायसँग माग गर्नुभएको छ।