दास व्यापारका लागि माफी माग्न बेलायती प्रधानमन्त्री तयार, क्षतिपूर्ति दिन भने अस्वीकार

बेलायती प्रधानमन्त्री एन्डी बर्नह्यामले ट्रान्सएट्लान्टिक दास व्यापारमा बेलायतको भूमिकाबारे राज्यका तर्फबाट औपचारिक माफी माग्न आफू तयार रहेको बताउनुभएको छ, तर आर्थिक क्षतिपूर्ति दिने कुरा अस्वीकार गर्नुभएको छ। एन्टिगुआ र बारबुडामा आयोजना हुने राष्ट्रमण्डल शिखर सम्मेलनमा सहभागी हुन जानुअघि लेबर पार्टीका नेता बर्नह्यामले शनिबार यो धारणा राख्नुभएको हो। गार्जियन पत्रिकामा लेखिएको लेखमा उहाँले लाखौँ मानिसले भोगेको पीडाप्रति दुःख र पश्चात्ताप व्यक्त गर्दै उक्त व्यापारलाई दास बनाइएकाहरूको अधिकारको क्रूर र बर्बर उल्लङ्घन भन्नुभएको छ।

सरकार प्रभावित पक्षसँग संरचित संवाद चाहने र औपचारिक माफीको माग सुन्नु त्यसको महत्त्वपूर्ण हिस्सा हुने उहाँको भनाइ छ। तर फरक युग र फरक कानुनमा भएको अपराधका लागि आजका बेलायती नागरिकलाई जिम्मेवार ठहर्‍याउन नमिल्ने भन्दै उहाँले क्षतिपूर्तिलाई सही समाधान नमानेको उल्लेख गर्नुभएको छ। राजा चार्ल्स तृतीय यतिबेला क्यारिबियाली भ्रमणमा हुनुहुन्छ र राजाले नोभेम्बर १ देखि ४ सम्म चल्ने सम्मेलन सम्बोधन गर्नुहुनेछ।

भ्रमणको पहिलो चरणमा मङ्गलबार बहामासमा राजाले दासप्रथालाई विगतको गहिरो पीडाका रूपमा स्वीकार गर्नुभएको थियो। बेलायतले दासत्वका लागि अहिलेसम्म न औपचारिक माफी मागेको छ, न क्षतिपूर्ति तिर्न सहमति जनाएको छ। बेलायती संसद्ले सन् १८३३ मा दासत्व अन्त्य गर्ने कानुन पारित गरेको थियो।