एनपीएल: ५ ओभरको खेलमा विराटनगरले बनायो कीर्तिमान, सुदूरपश्चिमलाई ३५ रनले हराउँदै पहिलो जित

नेपाल प्रिमियर लिगमा विराटनगर किंग्सले वर्षाका कारण पाँच ओभरमा झारिएको खेलमा सुदूरपश्चिम रोयल्सलाई ३५ रनले पराजित गरेको छ। तेस्रो खेलमा आएको यो विराटनगरको सिजनकै पहिलो जित हो। कीर्तिपुरस्थित त्रिवि क्रिकेट मैदानमा शनिबार साँझ ५ बजे सुरु हुनुपर्ने खेल राति ९ बजेर २० मिनेटमा मात्र सुरु भएको थियो।

भिजेको आउटफिल्ड र छोट्याइएको बाउन्ड्रीप्रति असन्तुष्टि जनाउँदै सुदूरपश्चिमले लामो समय मैदानमा उत्रन मानेको थिएन। नेपाल क्रिकेट संघका सचिव पारस खड्का, म्याच रेफ्री र टोली व्यवस्थापनबीचको छलफलपछि खेल सम्भव भएको हो। टस जितेर सुदूरपश्चिमले बलिङ रोजेपछि विराटनगरले २ विकेट गुमाएर १०५ रन बनाएको थियो।

शेहान जयसूर्याले ११ बलमा ३९, आन्द्रे रसेलले अविजित २९ र लोकेश बमले २५ रन बनाएका थिए। जयसूर्याले पहिलो ओभरमै पाँच छक्का प्रहार गर्दा विराटनगरले त्यो ओभरमा ३५ रन जोडेको थियो। जवाफमा सुदूरपश्चिम ३ विकेटमा ७० रनमा सीमित भएको छ।

रसेलले २ ओभरमा ८ रन मात्र दिएर एक विकेट पनि लिएका छन्। सोही दिन लुम्बिनी लायन्स र चितवन राइनोजबीचको खेल वर्षाका कारण रद्द भएको थियो। विराटनगरका कप्तान सन्दीप लामिछानेले जतिसुकै ओभरको खेल भए पनि मैदानमै नतिजा निकाल्नुपर्ने बताएका छन्।

प्रधानमन्त्री बालेन्द्र शाहले सामाजिक सञ्जालमा पाँच ओभरको खेल रमाइलो हुने रहेछ भन्ने टिप्पणी गर्नुभएको छ।