जिल्ला गोल्डकप: उदयपुरमा ७ वर्षपछि आजदेखि त्रियुगा गोल्डकप, वर्षाले संखुवासभा गोल्डकप दुई दिन सर्‍यो

उदयपुरमा सात वर्षदेखि रोकिएको गोल्डकपको अभाव पूरा गर्दै भोलि शनिबार, कात्तिक १४ गतेदेखि पहिलो त्रियुगा गोल्डकप फुटबल प्रतियोगिता सुरु हुने भएको छ। त्रियुगा नगरपालिका–१३ को हवाईफिल्डस्थित थरुहट उदयपुर रङ्गशालामा कात्तिक २१ गतेसम्म खेल हुनेछन्। आयोजक गाईघाट फुटबल क्लबका अध्यक्ष रञ्जन कार्कीका अनुसार विजेताले ५ लाख र उपविजेताले ३ लाख रुपैयाँ नगद पाउनेछन्।

विजेता टोलीलाई नगदसँगै ट्रफी र प्रमाणपत्र पनि दिइनेछ। स्वदेशी टोलीसँगै भारतको जर्जियन युथ क्लब पनि प्रतियोगितामा सहभागी हुनेछ। उद्घाटन खेल भोलि दिउँसो २ बजेर ३० मिनेटमा हुनेछ भने पहिलो चरणका खेल कात्तिक १७ गतेसम्म चल्नेछन्।

विधागत रूपमा उत्कृष्ट खेलाडीलाई पनि नगद पुरस्कार दिइने आयोजकले जनाएको छ। यता संखुवासभा गोल्डकप भने वर्षाका कारण दुई दिन पछाडि सरेको छ। लगातारको भारी वर्षाले खाँदबारीको मानेभञ्ज्याङस्थित मैदान हिलाम्मे भएपछि आयोजकले मिति सारेको हो।

आयोजक क्लबका अध्यक्ष प्रकाश घिमिरेका अनुसार पहिलो संस्करणको यो प्रतियोगिता अब कात्तिक १६ देखि २० गतेसम्म हुनेछ। यसमा आयोजक अरुण उपत्यका सामुदायिक विकास क्लबसहित आठ टोली सहभागी छन्। यहाँ पनि विजेताले ५ लाख र उपविजेताले ३ लाख रुपैयाँ पाउनेछन्।