नेपाल फुटबल लिगमा तीन नयाँ क्लब थपिने, बोलपत्र ३० कात्तिकसम्म

नेपाल फुटबल लिग, एनएफएलले तीन नयाँ क्लब थप्न बोलपत्र आह्वान गरेको छ। शुक्रबार जारी सूचनामा धरान, विराटनगर, जनकपुर, हेटौँडा, वीरगञ्ज, भक्तपुर, सुर्खेत र नेपालगञ्जलगायत सहरको प्रतिनिधित्व गर्ने क्लब खोल्न इच्छुकलाई आवेदन दिन भनिएको छ। बोलपत्र बुझाउने अन्तिम दिन कात्तिक ३० गते, अर्थात् नोभेम्बर १६ तोकिएको छ।

एनएफएलका अनुसार बोलपत्र फारामको दस्तुर ५० हजार रुपैयाँ छ, र यो रकम फिर्ता गरिने छैन। आवेदकले आफ्नो व्यावसायिक र आर्थिक पृष्ठभूमि, अर्को १० वर्ष क्लब चलाउने योजना तथा समाजमा आफ्नो साखबारे विवरण बुझाउनुपर्ने छ। नेपाली फुटबललाई व्यावसायिक बाटोमा लैजाने लक्ष्यसहित लिगको पहिलो संस्करण फागुन १ गतेदेखि सुरु हुने घोषणा भइसकेको छ।

घरेलु फुटबलका सात पुराना क्लबको सहभागिता यसअघि नै पक्का भइसकेको छ। तीमध्ये काठमाडौँ रेजर्स, ललितपुर सिटी र एफसी चितवनलगायत क्लब छन्।