चार दिनको झरीपछि खुल्यो उपत्यकाको आकाश, देखिए हिमशृङ्खला

चार दिनदेखि लगातार परेको झरी रोकिएपछि आइतबार दिउँसोदेखि काठमाडौँ उपत्यकाको आकाश खुलेको छ र साँझपख टाढाका हिमशृङ्खला प्रस्ट देखिएका छन्। कीर्तिपुरबाट मनास्लु, लाङटाङ, जुगल र गौरीशङ्कर हिमाल देखिएपछि धेरैले तस्बिर र भिडियो खिचेका छन्। अविरल वर्षाले बागमती र विष्णुमती नदीमा पानीको बहाव बढेको थियो भने विभिन्न ठाउँमा सडक यातायात प्रभावित भएको थियो।

घाम लागेसँगै सडकमा सवारी र पैदलयात्रीको चहलपहल बढेको छ। मौसम पूर्वानुमान महाशाखाका मौसमविद् सञ्जीव अधिकारीका अनुसार भारतको उत्तर प्रदेश आसपासको न्यूनचापीय क्षेत्र लुम्बिनी र सुदूरपश्चिमको दक्षिणतिर रहेकाले वर्षा ती भूभागमा केन्द्रित भएको हो। उक्त प्रणाली कमजोर हुँदै गएकाले काठमाडौँसहित बागमती प्रदेशमा मनसुनी गतिविधि पनि कमजोर भएको महाशाखाले जनाएको छ।

जल तथा मौसम विज्ञान विभागको पूर्वानुमानअनुसार भोलि सोमबार देशभर आंशिक बदली रहनेछ। हिमाली र पहाडी भू-भागका थोरै स्थानमा मेघगर्जन र चट्याङसहित मध्यमसम्मको वर्षा वा हिमपात हुने सम्भावना छ। सुदूरपश्चिमको तराईका थोरै स्थान तथा कोशी, मधेश, बागमती, गण्डकी र लुम्बिनीको तराईका एक-दुई स्थानमा पनि मेघगर्जनसहित मध्यमसम्मको वर्षा हुन सक्ने विभागले जनाएको छ।

विभागको सहरी पूर्वानुमानमा काठमाडौँमा २० प्रतिशत र पोखरामा ३० प्रतिशत वर्षाको सम्भावना देखाइएको छ भने विराटनगर र जनकपुरमा आंशिक बदली रहनेछ।