अमेरिकी ग्रीन कार्ड आवेदकले आर्थिक आत्मनिर्भरता देखाउनुपर्ने नयाँ नियम

अमेरिकाको नागरिकता तथा आप्रवासन सेवा, यूएससीआईएसले ग्रीन कार्डका अधिकांश आवेदकले आर्थिक रूपमा आत्मनिर्भर रहेको प्रमाण पेस गर्नुपर्ने नयाँ निर्देशिका लागू गरेको छ। सेप्टेम्बरदेखि कार्यान्वयनमा आएको यो निर्देशिका 'पब्लिक चार्ज', अर्थात् सरकारी सुविधामाथि निर्भर हुने सम्भावनाका आधारमा आवेदकलाई अयोग्य ठहर्‍याउनेसँग सम्बन्धित छ। पारिवारिक वा रोजगारीको आधारमा स्थायी बसोबासका लागि आवेदन दिनेहरू यसको मुख्य दायरामा परेका छन्।

अमेरिकी नागरिक र स्थायी बासिन्दाका पति वा पत्नी, सन्तान, आमाबुबा र मंगेतरदेखि उच्च डिग्रीधारी पेसाकर्मी, दक्ष कामदार, लगानीकर्ता, धार्मिक कार्यकर्ता र डीभी चिट्ठामार्फत जाने आप्रवासीसमेत यसमा समेटिएका छन्। बालबालिकालाई पनि यस नियमबाट छुट नभएको यूएससीआईएसले स्पष्ट पारेको छ। शरणार्थी र शरण माग्ने व्यक्ति, मानव बेचबिखनका पीडित, 'टी' र 'यू' भिसाधारी तथा महिलाविरुद्ध हिंसा ऐनअन्तर्गतका पीडितलाई भने नियमबाट छुट दिइएको छ।

अमेरिकी सरकारका लागि काम गरेका अफगान र इराकी दोभाषे, क्युबा, हाइटी र निकारागुआका प्रवेशकर्ता तथा निश्चित कूटनीतिज्ञ पनि छुटको सूचीमा छन्। प्रायोजकले भर्ने आई–८६४ आर्थिक समर्थनको शपथपत्र अझै महत्त्वपूर्ण रहे पनि त्यो पेस गर्दैमा आवेदक स्वतः योग्य नठहरिने निर्देशिकामा उल्लेख छ। पारिवारिक र केही रोजगारीमा आधारित आवेदकले पर्याप्त शपथपत्र पेस गर्न नसके त्यसैलाई अयोग्यताको आधार मानिन सक्छ।

प्रायोजकले वाचा गरेको आर्थिक सहायता वास्तवमै दिन सक्ने र चाहने हो कि होइन भनी अधिकारीले जाँच गर्न सक्नेछन्।