खेम सेन्चुरीको गीत विवादमा सहमति: विवादित शब्द र दृश्य हट्ने, शीर्षक फेरिने

गायक खेम सेन्चुरीको गीत 'बाहुन बाजे किन कसेको' बारे उठेको विवाद लिखित सहमतिमार्फत टुंगिएको छ। गीतले ब्राह्मण समुदायलाई होच्याएको दाबीसहित हिन्दूवादी अभियन्ता सागर थापालगायतले नेपाल प्रहरीको साइबर ब्यूरोमा उजुरी दिएका थिए। उजुरीकर्ताले गीत तुरुन्तै बन्द गर्नुपर्ने माग पनि राखेका थिए।

ब्यूरोका प्रवक्ता तथा सूचना अधिकारी दिलिपकुमार गिरीका अनुसार मुख्य आपत्ति सुँगुरको मासु खान आग्रह गर्ने पंक्तिमा थियो। ब्यूरोले मंगलबार दुवै पक्षलाई पहिलो पटक छलफलमा बोलाएको थियो, तर निष्कर्ष ननिस्केपछि बुधबार पुनः वार्ता गराएको थियो। बुधबारको दोस्रो चरणको वार्तामा सेन्चुरी आफ्नो गीतबाट विवादित पंक्ति हटाउन सहमत भएका छन्।

पूजाका बेला ब्राह्मणले भोजन गरेको दृश्य धमिलो पारिने र शीर्षकबाट 'बाहुन बाजे' शब्द फेरिने सहमतिपत्रमा उल्लेख छ। दुवै पक्षले सहमतिपत्रमा हस्ताक्षर गरेका छन् भने सेन्चुरीले गीत सम्पादन गर्ने लिखित प्रतिबद्धता जनाएका छन्। गिरीले गीतमा समुदायलाई सीधै निशाना बनाइएका शब्द रहेकाले विवाद बुधबारै टुंगिने बताउनुभएको थियो।

सेन्चुरी आफैँले लेखेको, संगीत दिएको र गाएको यो गीत तीन साताअघि युट्युबमा सार्वजनिक गरिएको थियो। हालसम्म यो गीत करिब ६५ लाखपटक हेरिएको छ।