निष्क्रिय कम्पनीलाई कर, शुल्क र जरिवाना मिनाहाको म्याद पुस मसान्तसम्म थप

सरकारले वर्षौंदेखि निष्क्रिय तथा अद्यावधिक हुन नसकेका कम्पनीलाई कर, शुल्क र जरिवाना मिनाहाको सुविधा लिन दिइएको म्याद २०८३ पुस मसान्तसम्म थप गरेको छ।

यसअघि यो म्याद २०८३ असोज मसान्तसम्म कायम थियो। कात्तिक ९ गतेको निर्णयअनुसार म्याद बढाएर पुस मसान्तसम्म पुर्‍याइएको हो। अघिल्लो म्याद सकिएको १२ दिनपछि समय थपिएको हो।

अर्थ मन्त्रालयले म्यादभित्र विवरण पेस नगरेका कम्पनीलाई गत आर्थिक वर्षका लागि लाग्ने कर, शुल्क तथा दस्तुर बुझाउने समय तीन महिना थप गरेको हो। थपिएको अवधिभित्र बुझाउने कम्पनीलाई जरिवाना नलाग्ने जनाइएको छ।

यो सुविधा लामो समयसम्म अद्यावधिक नभएका कम्पनी खारेज गर्ने प्रक्रियासँग पनि जोडिएको छ। सर्भर समस्याका कारण समयमै काम गर्न नसकेका व्यवसायीलाई म्याद थपले राहत मिल्ने अपेक्षा गरिएको छ।