कांग्रेस केन्द्रीय कार्यसमितिको पहिलो बैठक: १९ पदाधिकारीको वरीयता तोकियो, मंसिरभरि अभियान

नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिको पहिलो बैठकले १९ पदाधिकारीको वरीयता तोकेको छ। बिहीबार निर्वाचित पदाधिकारी तथा सदस्यको शपथपछि पार्टी केन्द्रीय कार्यालय सानेपामा बसेको बैठकले वरीयता तोकेको हो।

बैठकले चियापानको सट्टा बाढीपीडितको राहतमा जुट्ने र चार–चार महिनामा कामको समीक्षा गर्ने निर्णय गरेको छ। सभापति गगन थापाले पार्टीले अब हलभित्र सोफामा बसेर ताली बजाउने परम्परागत शुभकामना आदानप्रदान कार्यक्रम नगर्ने घोषणा गरेका छन्।

सभापति थापाले जनता र पार्टीलाई जोड्न मंसिर महिनाभरि देशव्यापी अभियान सञ्चालन गरिने बताए। महाधिवेशनको सन्देश जनतासम्म पुर्‍याउन र पार्टी संगठन सुदृढ गर्न ‘कांग्रेस तयार छ’ विशेष अभियान चलाइने जनाइएको छ।

वरिष्ठ उपसभापति विश्वप्रकाश शर्माले पार्टीभन्दा पहिले देशलाई केन्द्रमा राखेर काम गर्नुपर्ने बताए। यसैबीच, निर्वाचन आयोगमा नयाँ कार्यसमितिको नाम अद्यावधिक गर्ने जिम्मा कार्यवाहक मुख्यसचिव कृष्णप्रसाद दुलाललाई दिइएको छ।