स्थानीय र प्रदेश चुनावको तयारीमा दल: मधेसवादी दल साख जोगाउन जुटे, कोशीमा श्रम संस्कृति आक्रामक

आगामी वर्ष हुने स्थानीय तह र प्रदेश सभा निर्वाचनका लागि दलहरूले तयारी तीव्र पारेका छन्। गत फागुनको प्रतिनिधि सभा निर्वाचनमा एउटा पनि सिट नजितेका मधेसवादी दल संगठन बलियो बनाउन लागेका छन्। जनता समाजवादी पार्टी नेपाल, जनमत पार्टी, राष्ट्रिय मुक्ति पार्टी नेपाल र नागरिक उन्मुक्ति पार्टी नेपालजस्ता दल यस काममा सक्रिय छन्।

जनमत पार्टीले महाधिवेशन सकेको छ भने जसपा नेपाल र लोसपा नेपाल एकतापछि समायोजनमा छन्। अर्कोतर्फ श्रम संस्कृति पार्टीले गत निर्वाचनपछि पश्चिम नेपालमा पनि गतिविधि बढाएको छ। अध्यक्ष हर्क साम्पाङ हुम्लामा झोलुंगे पुल राख्ने अभियानका क्रममा कर्णाली प्रदेशका जिल्ला घुमिरहनुभएको पार्टी सचिव टीकाराम राईले जनाउनुभएको छ।

राईका अनुसार भ्रमणका क्रममा अध्यक्षले स्थानीयका गुनासो पनि सुनिरहनुभएको छ। साम्पाङले भेटघाटका भिडियो र तस्बिर फेसबुकमा राख्दै आउनुभएको छ। पार्टीले दार्चुलाको डुम्लिङमा झोलुंगे पुल बनाएर देशभर विस्तार हुने सन्देश दिएको छ।

भोटेकोशी बाढी प्रभावित रसुवा र नुवाकोटमा पनि पार्टीका स्वयंसेवक परिचालन गरिएको महासचिव अरेन राईले बताउनुभएको छ।