परम्परागत काठका सामग्री: गुल्मीमा अझै काठेपिङ, भोजपुरमा हराउँदै काठका भाँडा

आधुनिक सामग्रीको प्रयोग बढ्दै जाँदा गाउँघरका परम्परागत काठका सामग्री हराउँदै गए पनि पश्चिम गुल्मीका केही ठाउँमा काठेपिङको चलन अझै जोगिएको छ। गुल्मीको मालिका, इस्मा, मदाने र धुर्कोट गाउँपालिकामा दशैँमा लाग्ने मेला र सराय नाचमा काठेपिङ मुख्य आकर्षण बन्दै आएको छ। दशैँको टीकापछि गुल्मीका विभिन्न ठाउँमा सराय नाच भइरहेका छन् र त्यहाँ स्थानीयको राम्रो भीड जम्ने गरेको छ।

आधुनिक प्रविधिका ठूला पिङ र मनोरञ्जनका अन्य साधन गाउँसम्म पुगेपछि स्थानीय रूपमा बनाइने काठेपिङ र लिङ्गेपिङको प्रचलन घटेको छ। यता भोजपुरमा भने दूध, दही र घिउ राख्ने काठका ठेकी, हर्पे र दुदेराको प्रयोग पातलिँदै गएको छ। पहिले पशुपालन गर्ने परिवारमा यस्ता सामग्री अनिवार्यजस्तै हुन्थे र तिनलाई गाउँमै बनाइन्थ्यो।

प्लास्टिक र धातुका भाँडा बजारमा सजिलै पाइन थालेपछि काठका सामग्री बनाउने चलन घटेको टेम्केमैयुङ गाउँपालिका–५ का रामबहादुर विष्टले बताउनुभएको छ। अहिले यस्ता सामग्री बनाउने र प्रयोग गर्ने दुवै चलन हराउँदै गएको छ।