एनपीएल: १७ वर्षीय राहुलको ४ विकेट, काठमाडौँ ११५ रनमै अलआउट, मैदानमा कम दर्शक

नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सका युवा बलर राहुल यादवले ४ विकेट लिँदा काठमाडौँ गोर्खाज ११५ रनमा अलआउट भएको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर पहिले ब्याटिङ रोजेको काठमाडौँले १९.३ ओभरमा सबै विकेट गुमाएको हो। पावरप्लेमै काठमाडौँले ३ विकेट गुमाएको थियो।

राहुलले ४ ओभरमा ३१ रन दिँदै साम हेजलेट, स्मित पटेल, कप्तान करण केसी र आदिल आलमलाई आउट गर्नुभयो। सैफ हसनले २ विकेट लिनुभयो भने मोइन अली, कप्तान हरमीत सिंह र ललित राजवंशीले १–१ विकेट लिनुभयो। काठमाडौँका लागि भीम सार्कीले २९ बलमा ४ चौकासहित सर्वाधिक ३३ रन जोड्नुभयो।

राशिद खानले १७ र स्मित पटेलले १३ रन बनाउनुभयो। ११६ रनको लक्ष्य पछ्याएको जनकपुरले १६ ओभरमा २ विकेट गुमाएर १०० रन पुर्‍याएको थियो, जसमा मोइन अलीको ४९ बलमा अविजित ५१ रन थियो। काठमाडौँको यो पहिलो खेल हो भने जनकपुर पहिलो खेलमा कर्णाली याक्ससँग १९ रनले पराजित भएको थियो।

वर्षाको पूर्वानुमानबीच टिकट सबै बिक्री भएको भनिए पनि रंगशालाका धेरै सिट खाली देखिएका छन्। धुम्मिएको मौसमका कारण दिउँसो ३ बजेदेखि नै फ्लडलाइट बालिएको छ।