सौराहामा पहिलो अन्तर्राष्ट्रिय तेक्वान्दो च्याम्पियनसिप, करिब ८०० खेलाडी अपेक्षित

चितवनको सौराहामा कात्तिक १३ गते शुक्रबारदेखि पहिलो अन्तर्राष्ट्रिय खुला तेक्वान्दो च्याम्पियनसिप सुरु हुने भएको छ। चितवन तेक्वान्दो डोजाङले १५ गतेसम्म चल्ने ‘प्रथम सौराहा अन्तर्राष्ट्रिय खुला तेक्वान्दो च्याम्पियनसिप–२०२६’ आयोजना गरेको हो। आयोजकका अनुसार नेपालका सातै प्रदेशसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानलगायत देशका करिब ८०० खेलाडी सहभागी हुने अपेक्षा छ।

खेलाडीले पुम्से र ग्योरोगी विधामा उमेर तथा तौल समूहअनुसार प्रतिस्पर्धा गर्नेछन्। स्वदेशी र विदेशी खेलाडीलाई एउटै मञ्चमा उतार्ने, उनीहरूको क्षमता बढाउने, अनुभव साटासाट गराउने र अन्तर्राष्ट्रिय मित्रता फैलाउने उद्देश्य राखिएको छ। टिमतर्फ पहिलो हुनेलाई ५० हजार, दोस्रोलाई ३० हजार र तेस्रोलाई २० हजार रुपैयाँ पुरस्कार दिइने आयोजकले जनाएको छ।