मोरङको केरौन १३२ केभी सबस्टेसन निर्माण सम्पन्न

मोरङको कानेपोखरी गाउँपालिका–२ मा १३२ केभी क्षमताको केरौन सबस्टेसन बनेर तयार भएको छ। मोरङ र आसपासको बिजुली माग धान्न र आपूर्ति भरपर्दो बनाउन यो सबस्टेसन बनाइएको हो। नेपाल विद्युत् प्राधिकरणले यसलाई आउँदो कात्तिक १४ गते शनिबार र १५ गते आइतबार चार्ज गर्ने तयारी गरेको जनाएको छ।

ती दिन पूर्व–पश्चिम प्रसारण लाइनको दुहबी–दमक खण्डलाई सबस्टेसनमा लुप इन र लुप आउट गरिनेछ। प्राधिकरणका अनुसार यसका लागि दुवै दिन बिहान ४ बजेदेखि मध्यान्ह १२ बजेसम्म उक्त लाइन बन्द गरिनेछ। त्यस अवधिमा झापा, इलाम, पाँचथर र ताप्लेजुङका सबै भाग तथा मोरङको उर्लाबारी, पथरी र आसपासमा बिजुली बन्द रहनेछ।

सबस्टेसनमा तीनवटा पावर ट्रान्सफर्मर जडान गरिएका छन् र कुल क्षमता करिब १४८.५ एमभीए छ। प्राधिकरणका अनुसार अहिले यस क्षेत्रमा बिजुली पुर्‍याउने ३३ केभी लाइन निकै लामो हुँदा प्राविधिक चुहावट बढी छ र उपभोक्ताले बारम्बार ट्रिपिङ भोग्नुपरेको छ। नयाँ सबस्टेसन चलेपछि चुहावट घट्ने र आपूर्ति भरपर्दो हुने अपेक्षा गरिएको छ।