लुम्बिनी केबलकारमा भारतीय पर्यटक २४ प्रतिशतले बढे

कम्पनीको वार्षिक प्रतिवेदनअनुसार लुम्बिनी केबलकार चढ्ने भारतीय पर्यटक गत आर्थिक वर्ष २०८२/८३ मा अघिल्लो वर्षभन्दा करिब २४ प्रतिशतले बढेका छन्। कम्पनीको मंगलबार भएको २३औँ वार्षिक साधारणसभामा अध्यक्ष चन्द्रप्रसाद ढकालले सञ्चालक समितिको प्रतिवेदन पेस गर्दै यो जानकारी दिनुभएको छ। अध्यक्ष ढकालका अनुसार केबलकारमा यात्रा गर्ने कुल पर्यटकमध्ये भारतीयको हिस्सा करिब २९ प्रतिशत पुगेको छ।

उत्तर प्रदेश, दिल्ली, बिहार, झारखण्ड, केरला र आन्ध्र प्रदेशबाट आउनेहरू पाल्पाको वसन्तपुर डाँडाका कामाख्या देवी र प्राचीन दुर्गा मन्दिर पुग्ने क्रम बढेको उहाँले बताउनुभएको छ। भारतीय पर्यटक तान्न कम्पनीले सीमा क्षेत्रका सवारी चालकलाई विशेष सुविधा दिएको र भारतीय भ्लगरमार्फत प्रचार तीव्र पारेको प्रतिवेदनमा उल्लेख छ। माथिल्लो स्टेसन वसन्तपुरमा क्यासिनोसहितको पाँचतारे होटल बनाउने काम अघि बढेको छ।

कम्पनीले रोलर कोस्टरलगायत मनोरञ्जनका संरचना थप्ने योजना पनि बनाएको छ।