भूपिन खड्का र जुनु रानाको कृतिलाई विमल गुरुङ कृति पुरस्कार

कवि विमल गुरुङ स्मृति पुस्तकालय व्यवस्थापन समितिले विमल गुरुङ कृति पुरस्कार–२०८२ भूपिन खड्काको 'मध्यको उज्यालो' र जुनु रानाको 'लाहुरेनी सौन्दर्य' लाई संयुक्त रूपमा दिने घोषणा गरेको छ। समितिका अनुसार पुरस्कृत दुवै कृति निबन्धसङ्ग्रह हुन्। पुरस्कारअन्तर्गत २ लाख रुपैयाँ नगद र ताम्रपत्र प्रदान गरिनेछ।

यस वर्ष स्वदेश र विदेशमा रहेका लेखक तथा कविका नेपाली भाषाका ५२ कृति प्रतिस्पर्धामा परेका थिए। समितिले तीमध्येबाट पहिले १० उत्कृष्ट कृतिको सूची तयार पारेको थियो र अन्तिम चरणमा यी दुई कृति छानिएका हुन्। चितवनको एक शैक्षिक संस्थामा अध्यापन गर्ने खड्काका यसअघि चार कवितासङ्ग्रह, एक आख्यान र एक निबन्धसङ्ग्रह प्रकाशित छन्।

बागलुङकी राना हाल हङकङमा रहेर साहित्य सिर्जनामा सक्रिय हुनुहुन्छ र उहाँको कवितासङ्ग्रह 'रातो नदी' यसअघि प्रकाशित भइसकेको छ। पुस्तकालयका अध्यक्ष पूर्णबहादुर गुरुङका अनुसार दुवै सर्जकलाई कात्तिक १९ गते सुनसरीस्थित पुस्तकालयको भवनमा पुरस्कार हस्तान्तरण गरिनेछ।