भारत–पाकिस्तान: २५० प्रतिशत भन्सार धम्कीले द्वन्द्व रोकेको ट्रम्पको दाबी, एससीओ फोरममा पाकिस्तानलाई निम्तो

अमेरिकी राष्ट्रपति डोनाल्ड ट्रम्पले भारत र पाकिस्तानबीचको सैन्य द्वन्द्व रोक्न दुवै देशलाई २५० प्रतिशत भन्सार शुल्कको धम्की दिएको दाबी दोहोर्‍याउनुभएको छ। टेक्सासको कर्पस क्रिस्टीमा बुधबार भएको चुनावी सभामा उहाँले दुवै देशका प्रधानमन्त्रीलाई सम्पर्क गरेर लडाइँ नरोके अमेरिकासँग व्यापार गर्न नपाउने चेतावनी दिएको बताउनुभएको छ। ट्रम्पका अनुसार उहाँले अन्त्य गरेको दाबी गरिएका आठ युद्धमध्ये पाँचवटा व्यापारिक दबाबबाट टुंगिएका हुन्।

भारतले भने युद्धविराममा कुनै बाह्य मध्यस्थता भएको कुरा अस्वीकार गर्दै आफ्नै सैन्य कारबाहीका कारण युद्धविराम भएको बताउँदै आएको छ। यसैबीच, ‘अपरेशन सिन्दूर’ को झन्डै १८ महिनापछि भारतले पाकिस्तानलाई शाङ्घाई सहयोग सङ्गठन, एससीओको पहिलो सिभिलाइजेशन डायलग फोरममा निम्तो दिएको छ। नोभेम्बर २० देखि २२ सम्म नयाँ दिल्लीमा हुने कार्यक्रममा पाकिस्तानका राष्ट्रिय सम्पदा तथा संस्कृति मन्त्री औरङ्गजेब खान खिचीलाई प्रतिनिधिमण्डलको नेतृत्व गर्न आमन्त्रण गरिएको समाचार संस्था एएनआईले जनाएको छ।

मन्त्री आफैँ सहभागी हुने वा अरू प्रतिनिधि पठाउने भन्ने पाकिस्तानले अझै पुष्टि गरेको छैन। भारतको विदेश र संस्कृति मन्त्रालयले संयुक्त रूपमा आयोजना गर्ने यो कार्यक्रमले एससीओका १० सदस्य देशबीच सांस्कृतिक आदानप्रदान र साझा सम्पदाको संरक्षणलाई बढावा दिने लक्ष्य राखेको छ।