तिहारअघि नै फुलेको सयपत्रीले किसान चिन्तित

तिहार आउन करिब दुई साता बाँकी रहँदा नै सयपत्री फुलिसकेपछि झापा र तनहुँका किसान फूल जोगाउने र बजार पाउने चिन्तामा परेका छन्। तनहुँको म्याग्दे गाउँपालिका–४ छिम्लिस्वाँरामा चण्डेश्वरी फलफूल तथा तरकारी कृषक समूहले व्यावसायिक रूपमा लगाएको सयपत्री दसैँमै ढकमक्क फुलेको छ। समूहकी अध्यक्ष जितमाया रानाका अनुसार गत वर्ष ६ रोपनीको खेतीबाट ४ लाख रुपैयाँभन्दा बढी आम्दानी भएपछि यस वर्ष सामूहिक र व्यक्तिगत गरी १६ रोपनीमा खेती विस्तार गरिएको छ।

भारतबाट गत वर्षजस्तो फूल नभित्रिए उत्पादन बिक्री हुने आशा रहेको रानाले बताउनुभएको छ। तनहुँमा म्याग्देबाहेक आँबुखैरेनी गाउँपालिका तथा शुक्लागण्डकी, भीमाद र व्यास नगरपालिकामा पनि व्यावसायिक सयपत्री खेती हुन्छ। झापामा भने वर्षाले फूल बिग्रने डरले किसानले फूल टिप्ने, माला उन्ने र कोल्डस्टोरमा भण्डारण गर्ने काम तीव्र बनाएका छन्।

तीन–तीन दिनमा फूल टिपेर बिर्तामोडको रोयल कोल्डस्टोरमा राखिरहेको बुद्धशान्ति–३ स्थित कृषि कम्पासका व्यवस्थापक विनोद रिजालले बताउनुभएको छ। वर्षासँगै भारतबाट आयात हुने फूलले पनि स्थानीय किसानलाई बजारमा चुनौती थपेको छ। स्वदेशी फूलको संरक्षण माग गर्दै बिर्तामोडका किसानले प्रमुख जिल्ला अधिकारीलाई आठ बुँदे ज्ञापनपत्र बुझाएका छन्।