चाडपर्व खर्च नपाएको भन्दै ६ सयभन्दा बढी श्रमिकको उजुरी

दसैँमा चाडपर्व खर्च नपाएको भन्दै ६ सयभन्दा बढी श्रमिकले श्रम तथा व्यवसायजन्य सुरक्षा विभागमा उजुरी गरेका छन्। विभागका अनुसार दसैँअघि इमेल र पोर्टलमार्फत यस्ता उजुरी आएका हुन् र अहिले पनि थपिँदै छन्। श्रम ऐन, २०७४ को दफा ३७ अनुसार रोजगारदाताले वर्षमा एकपटक एक महिनाको आधारभूत पारिश्रमिक बराबर चाडपर्व खर्च दिनुपर्छ।

श्रमिकले अर्को चाडपर्व नमागेमा यो रकम दसैँमा दिनुपर्ने र एक वर्ष सेवा नपुगेकालाई काम गरेको अवधिको अनुपातमा दिनुपर्ने व्यवस्था छ। उजुरी आएपछि विभागले सुनुवाइ सुरु गरी सम्बन्धित संस्थालाई निर्देशन दिएको छ। असोज ३० गते पत्र पठाइएपछि एउटा मुटु अस्पतालले २४० कर्मचारीलाई करिब ४२ लाख ५४ हजार रुपैयाँ भुक्तानी गरेको छ।

विभागका महानिर्देशक चक्रपाणी पाण्डेका अनुसार कानुनी व्यवस्था लागू गराउन रोजगारदाता र प्रतिष्ठानलाई कडा निर्देशन दिइएको छ।