डिगोसँगको साझेदारीमा जिओहटस्टार नेपाल भित्रियो

स्ट्रिमिङ प्लेटफर्म जिओहटस्टार नेपाली ओटीटी प्लेटफर्म डिगोसँग साझेदारी गर्दै औपचारिक रूपमा नेपाली बजारमा भित्रिएको छ। कम्पनीका अनुसार बेलायत, क्यानडा, सिङ्गापुर र मध्यपूर्व तथा उत्तर अफ्रिका क्षेत्रमा सेवा सुरु गरेको केही साताभित्रै जिओहटस्टारले नेपाल प्रवेश गरेको हो। डिगोलाई नेपाल सरकारबाट स्वीकृति पाएको देशको पहिलो सब्स्क्रिप्सन ओटीटी भनिएको छ।

भारतीय चलचित्र र टेलिभिजनप्रति नेपाली दर्शकको लामो लगाव र सांस्कृतिक निकटतालाई ध्यानमा राखेर यो विस्तार गरिएको बताइएको छ। साझेदारीअनुसार डिगोभित्रै जिओहटस्टारको छुट्टै खण्ड बनाइएको छ। त्यसमा ‘१२थ फेल’, ‘भेडिया’, ‘केसरी च्याप्टर २’, ‘सुपर ३०’ जस्ता चलचित्र राखिएका छन्।

‘हुंकार’, ‘चिरैया’ जस्ता जिओहटस्टार ओरिजिनल, दैनिक टेलिभिजन कार्यक्रम र बालबालिकाका सामग्री पनि उपलब्ध छन्। ‘बिग बोस’, ‘कफी विथ करण’ जस्ता चर्चित कार्यक्रम पनि हेर्न सकिन्छ। कम्पनीले घोषणा गरेको विशेष सुरुआती मूल्यअनुसार मासिक शुल्क २४९ रुपैयाँबाट सुरु हुन्छ।