प्रज्ञा–प्रतिष्ठानमा बृहत् पुस्तक प्रदर्शनी सुरु

नेपाल प्रज्ञा–प्रतिष्ठानमा बृहत् पुस्तक प्रदर्शनी–२०८३ सुरु भएको छ। कमलादीस्थित प्रतिष्ठान परिसरमा उपकुलपति अविनाश श्रेष्ठले शुक्रबार प्रदर्शनीको उद्घाटन गर्नुभएको छ। पढ्ने संस्कृति बढाउने र पाठक तथा प्रकाशकबीचको सम्बन्ध बलियो बनाउने लक्ष्यसहित प्रदर्शनी आयोजना गरिएको प्रतिष्ठानले जनाएको छ।

उद्घाटनका क्रममा उपकुलपति श्रेष्ठले समाजको विकास र ज्ञान उत्पादनमा पुस्तकको भूमिका अझै कायम रहेको बताउनुभएको छ। उहाँले प्रतिष्ठानको प्रदर्शनीले ज्ञान फैलाउन मद्दत गर्ने पनि बताउनुभएको छ। प्रदर्शनी असोज १८ गतेसम्म चल्नेछ।

प्रतिष्ठानका अनुसार नेपाली भाषा, साहित्य, कला, संस्कृति, दर्शन र ज्ञान–विज्ञानसम्बन्धी पुस्तक ४० प्रतिशतसम्म छुटमा बिक्री गरिनेछ। सरकारी र संस्थागत प्रकाशनसँगै निजी प्रकाशन गृह, पुस्तक वितरक र सम्बन्धित संस्थाले पनि कक्ष राखेर पुस्तक प्रदर्शन र बिक्री गरिरहेका छन्। सहभागीमा साझा प्रकाशन, राष्ट्रिय अभिलेखालय, ललितकला, नेपालय र इन्डिगो इन्कलगायत रहेका छन्।

प्रदर्शनीमा इतिहास, समाजशास्त्र, बालसाहित्य र लोकसाहित्यसम्बन्धी पुस्तक पनि राखिएका छन्। सूचनामूलक र सिर्जनात्मक विधाका पुस्तकलाई कक्षमा प्राथमिकता दिइएको छ। आयोजकले तोकेको मापदण्ड र कक्षको उपलब्धताका आधारमा सहभागी प्रकाशक तथा संस्थालाई निःशुल्क कक्ष दिइएको प्रतिष्ठानले जनाएको छ।