अपहरणको आशङ्कापछि एयर इन्डियाको विमान जयपुर मोडियो, सबै यात्रु सुरक्षित

जर्मनीको फ्र्याङ्कफर्टबाट दिल्ली जाँदै गरेको एयर इन्डियाको एक विमान अपहरणको सङ्केत आएपछि बुधबार भारतको जयपुरमा सुरक्षित अवतरण गराइएको छ। उडान नम्बर एआई २०३० को बोइङ ७८७–९ विमान अघिल्लो राति करिब १०:४५ बजे उडेको थियो। विमान आकाशमै हुँदा पाइलटले 'स्क्वाक ७५००' कोड प्रसारण गरेका थिए, जसले अपहरण वा गैरकानुनी हस्तक्षेप जनाउँछ।

बिहान करिब ९:०५ बजे हवाई ट्राफिक नियन्त्रण र अहमदाबादका अधिकारीले आपतकालीन सूचना पाएपछि विमानलाई जयपुरतर्फ मोडिएको थियो। जयपुर विमानस्थलका प्रमुख चरण सिंहका अनुसार विमान बिहान करिब ९:३५ बजे अवतरण गरेको हो। विमानमा करिब ३०६ यात्रु सवार थिए र सबै सुरक्षित छन्।

अवतरणपछि विमानलाई छुट्टै स्थानमा राखेर जाँच गरिएको छ। केन्द्रीय औद्योगिक सुरक्षा बल, स्थानीय प्रहरी र बम निष्क्रिय पार्ने टोलीले विमान र यात्रुका सामान निरीक्षण गरेका छन्। राजस्थान प्रहरीका अतिरिक्त महानिर्देशकसहित वरिष्ठ अधिकारी पनि विमानस्थल पुगेका थिए।

प्रारम्भिक जानकारीअनुसार पाइलटबाट भूलवश सङ्केत सक्रिय भएको हुन सक्ने आशंका छ, तर यसको आधिकारिक पुष्टि भएको छैन। सुरक्षा चेतावनीबारे अनुसन्धान जारी छ। यात्रुलाई मानक कार्यविधिअनुसार आआफ्नो गन्तव्यसम्म पुर्‍याइने जनाइएको छ।