अस्ट्रेलियामा आप्रवासी कामदार कटौती प्रस्तावको विरोध

अस्ट्रेलियामा आप्रवासी कामदार घटाउने प्रमुख दलहरूको प्रस्तावविरुद्ध अस्ट्रेलियन होटल्स एसोसिएसनले व्यङ्ग्यात्मक विज्ञापन सार्वजनिक गरेको छ। लेबर पार्टी, कोलिसन गठबन्धन र वन नेसन पार्टीले आप्रवासन कटौतीका नीति अघि सारिरहेका बेला यो विज्ञापन आएको हो। ती दलका नीतिमा आगामी वर्षहरूमा आप्रवासीको सङ्ख्या झन्डै ७ लाख ५० हजारसम्मले घटाउने कुरा छ।

विज्ञापनमा एक व्यक्तिले 'आप्रवासी कामदारबिना अस्ट्रेलिया चलाउन' लेखिएको ठूलो रातो बटन थिचेपछिको काल्पनिक अवस्था हास्यपूर्ण शैलीमा देखाइएको छ। बटन थिचिएपछि क्याफे र पबका कर्मचारी काम छोडेर निस्किएका दृश्य त्यसमा छन्। आप्रवासी कामदार घटाउँदा अर्थतन्त्र र दैनिक जीवनमा पर्ने असरतर्फ ध्यान खिच्न विज्ञापन ल्याइएको सङ्घले जनाएको छ।

सङ्घका प्रमुख कार्यकारी अधिकृत स्टेफेन फर्गुसनका अनुसार अस्पताल, वृद्ध स्याहार, बधशाला, फलफूल टिप्ने काम र आतिथ्य क्षेत्र आप्रवासी कामदारमा निर्भर छन्।