विज्ञान र नवप्रवर्तनलाई प्राथमिकता, सरकारको १६५ कानुन बनाउने लक्ष्य

विज्ञान, प्रविधि र नवप्रवर्तनको विकास तथा देशको समृद्धिका लागि चाहिने कानुन बनाउने काम सरकारको प्राथमिकतामा रहेको दुई मन्त्रीले बताउनुभएको छ। सरकारले १६५ वटा कानुन बनाउने लक्ष्य लिएको छ। विज्ञान, प्रविधि तथा नवप्रवर्तनमन्त्री महावीर पुन र कानुन, न्याय तथा संसदीय मामिलामन्त्री सोभिता गौतमले चितवनको भरतपुरमा स्थानीयवासीसँगको साक्षात्कार कार्यक्रममा सरकारका प्राथमिकता सुनाउनुभएको हो।

नवप्रवर्तन, प्रविधिको उपयोग र कानुन निर्माण सरकारको पहिलो प्राथमिकतामा रहेको दुवै मन्त्रीले बताउनुभएको छ। मन्त्रालय नयाँ भएकाले र आवश्यक कानुन नहुँदा सुरुमा केही अप्ठ्यारा आएको मन्त्री पुनले स्वीकार गर्नुभएको छ। कानुन बनाउने प्रक्रिया लामो र जटिल भए पनि अध्यादेशमार्फत कानुनी आधार तयार भएको उहाँको भनाइ छ।

अब मन्त्रालयले योजना र अनुसन्धानका काम छिटो अघि बढाउने मन्त्री पुनले बताउनुभएको छ। चुनौती पार गर्दै सरकार समृद्ध नेपाल निर्माणतर्फ अघि बढिरहेको उहाँको दाबी छ। मन्त्री गौतमले लोकतन्त्रमा जनता सर्वोच्च हुने र जनप्रतिनिधि जनताप्रति जवाफदेही हुनुपर्ने बताउनुभएको छ।