बूढीगण्डकी प्राधिकरण विधेयकको सिद्धान्त स्वीकृत, विपद् देखाएर जलाशय आयोजना रोक्न नहुने भट्टराईको भनाइ

राष्ट्रिय गौरवको बूढीगण्डकी आयोजना अघि बढाउन सरकारले बूढीगण्डकी विकास प्राधिकरण विधेयकको सिद्धान्त स्वीकृत गरेको छ। पूर्वप्रधानमन्त्री डा. बाबुराम भट्टराईले यो निर्णयको स्वागत गर्नुभएको छ।

भोटेकोशी, त्रिशुली र बूढीगण्डकी नदीमा हालै आएको हिम–चट्टान पहिरोपछि ठूला जलाशययुक्त आयोजनामाथि प्रश्न उठ्न थालेका छन्। विपद्‌लाई कारण देखाएर त्यस्ता आयोजना बनाउनै हुँदैन भन्नु विडम्बनापूर्ण भएको डा. भट्टराईले सामाजिक सञ्जालमार्फत बताउनुभएको छ।

उहाँले यस्तो तर्कलाई ठूलो भूकम्पपछि बहुतले भवन बनाउन हुँदैन भनेजस्तै हास्यास्पद भन्नुभएको छ। भूकम्प बारम्बार जाने जापानजस्ता देशमा पनि अग्ला भवन बनिरहेको उदाहरण उहाँले दिनुभएको छ। बूढीगण्डकीलाई बहुउद्देश्यीय आयोजनाका रूपमा अघि बढाउन उहाँले सरकारलाई सुझाव दिनुभएको छ।

जोखिम प्रतिरोधी संरचना बनाउन र दिगो वातावरण संरक्षणमा ध्यान दिन पनि उहाँले आग्रह गर्नुभएको छ।