कांग्रेसमा समानान्तर महाधिवेशन, देउवा पक्षको मंसिर २१–२३ मा

नेपाली कांग्रेसमा दुई समूहले छुट्टाछुट्टै महाधिवेशन गर्न थालेपछि पार्टी विभाजनको संघारमा पुगेको छ। संस्थापन पक्षले आफ्नो महाधिवेशन सम्पन्न गरिसकेको छ। निवर्तमान सभापति शेरबहादुर देउवा समूहले भने मंसिर २१ देखि २३ गतेसम्म छुट्टै महाधिवेशन गर्ने गरी तल्लो तहका अधिवेशन तीव्र रूपमा गरिरहेको छ।

२०८२ भदौ २३ र २४ गतेको जेनजी आन्दोलनपछि चर्किएको विवादले पार्टी व्यवहारमा विभाजित भइसकेको छ, तर औपचारिक घोषणा हुन बाँकी छ। तत्कालीन महामन्त्रीद्वय गगन थापा र विश्वप्रकाश शर्माले १४औँ महाधिवेशनबाट आएको केन्द्रीय समितिको सहमतिबिना गराएको विशेष महाधिवेशनको वैधानिकता र नेतृत्वको आधिकारिकतामा विवाद छ। नेपाली कांग्रेस २००६ सालमा नेपाली राष्ट्रिय कांग्रेस र नेपाल प्रजातन्त्र कांग्रेसको एकीकरणबाट जन्मिएको थियो।

पार्टी यसअघि २००९ र २०५९ सालमा दुई पटक फुटेको थियो। २०५९ को विभाजनपछि छुट्टिएको समूहले नेपाली कांग्रेस (प्रजातान्त्रिक) नाम राखेको थियो।