चालु आर्थिक वर्षको तीन महिनामा बजेटको १८.६५ प्रतिशत मात्र खर्च

चालु आर्थिक वर्षको पहिलो तीन महिनामा सरकारले कुल विनियोजनको करिब १८.६५ प्रतिशत मात्र बजेट खर्च गरेको छ। कोष तथा लेखा नियन्त्रक कार्यालयका अनुसार यो अवधिमा झन्डै ३ खर्ब ९६ अर्ब रुपैयाँ खर्च भएको छ। विकास बजेट अर्थात् पुँजीगत खर्चमा भने गत वर्षभन्दा केही सुधार देखिएको छ।

कार्यालयको तथ्याङ्कअनुसार यस वर्ष करिब ६.५९ प्रतिशत अर्थात् झन्डै २८ अर्ब रुपैयाँ पुँजीगत खर्च भएको छ। गत वर्षको सोही अवधिमा यस्तो खर्च करिब ४.७ प्रतिशतमा सीमित थियो। गत वर्ष भदौमा भएको जेनजी आन्दोलनका कारण विकास खर्च प्रभावित भएको थियो।

चालु खर्चतर्फ करिब २ खर्ब ९१ अर्ब ६५ करोड रुपैयाँ खर्च भएको छ, जुन कुल बजेटको झन्डै २३ प्रतिशत हो। पुँजीगत खर्च केही बढे पनि समग्र बजेट खर्च गर्ने सरकारी क्षमता भने बढ्न सकेको छैन। राजस्वतर्फ सरकारले यस वर्ष करिब १५ खर्ब ८० अर्ब ३१ करोड रुपैयाँ उठाउने लक्ष्य राखेको छ।

तीन महिनामा झन्डै २ खर्ब ९८ अर्ब ७० करोड रुपैयाँ राजस्व सङ्कलन भएको छ। यस वर्ष राजस्व सङ्कलन भने अपेक्षाअनुसार देखिएको छ।