दसैँका लागि सिँगारिँदै मैतीदेवी मन्दिर परिसर

बडादसैँ नजिकिँदै गर्दा काठमाडौँ महानगरपालिका–३० स्थित मैतीदेवी मन्दिर परिसरलाई सफा गर्ने, रङ लगाउने र सजाउने काम तीव्र बनाइएको छ। मैतीदेवी मन्दिर क्षेत्र प्रबन्ध समितिका सदस्य सचिव रमेश खड्गीका अनुसार रङरोगन सकिएपछि एक–दुई दिनभित्र झिलिमिली बत्ती जडान सुरु गरिनेछ। यसपालि सडकदेखि नै बत्ती राखिने र त्यसपछि मन्दिरको छतमा पनि बत्ती जडान गरिने योजना रहेको उहाँले बताउनुभएको छ।

लामो समयदेखि धुवाँले कालो बनेका मन्दिरभित्रका संरचनासहित छत र भित्री भागको विशेष सरसफाइ गरिएको छ। दसैँको तयारीसँगै मन्दिर परिसरमा विभिन्न संरचनाको निर्माण, मर्मत र स्तरोन्नति पनि भइरहेको छ। दसैँका बेला मैतीदेवीमा दर्शन र पूजाका लागि भक्तजनको भीड लाग्ने गर्छ।