सडक अवरुद्ध हुँदा सोह्र श्राद्धमा कागबेनी सुनसान

भीषण वर्षाका कारण सडक अवरुद्ध भएपछि सोह्र श्राद्धमा तीर्थालुको घुइँचो लाग्ने मुस्ताङ जिल्लाको कागबेनी यस वर्ष सुनसान बनेको छ। असोज ९ देखि ११ गतेसम्म परेको वर्षापछि पहिरो र सडक कटानले बेनी–जोमसोम–कोरला सडकखण्ड बन्द हुँदा यहाँ श्राद्ध गर्न आउनेको सङ्ख्या नगण्य भएको छ। दामोदरकुण्डबाट बगेर आउने काली र मुक्तिनाथ क्षेत्रका धाराबाट आउने गण्डकी मिसिने यो संगमस्थलमा पिण्डदान र तर्पण गरे पितृ सन्तुष्ट हुने र पुण्य मिल्ने आस्था छ।

पितृपक्षमा तर्पण गर्न यहाँ स्वदेशका विभिन्न भागका साथै भारतबाट पनि तीर्थालु आउने गर्छन्। स्थानीय पुरोहित बालकृष्ण सुवेदीका अनुसार अघिल्ला वर्षहरूमा सोह्र श्राद्ध सुरु भएपछि दिनहुँ करिब ८ सयदेखि एक हजारसम्म तीर्थालु कागबेनी पुग्थे। यस वर्ष भने दैनिक करिब २० देखि ३० जना मात्र आइरहेको उहाँले बताउनुभएको छ।

तीर्थालुको आवागमन घटेपछि कागबेनी र जोमसोमका होटलमा पाहुना नआउँदा व्यवसाय प्रभावित भएको छ। चहलपहल नहुँदा श्राद्धकर्म गराउने पुरोहितहरू पनि अहिले फुर्सदिला बनेका छन्।